"بحران عطش" استاد ولی الله کلامی زنجانی.
بحران عطش (بسته شدن راه فرات)
**********
کربلاده سو یولی باغلانور الله بو گئجه
ال پیغمبر عطشدن یانور الله بو گئجه
*****
گینه سالدی سو سوزی دللره عباسین ادین
اورگدور اهل حرم اصغره عباسین ادین
سسلنوللر چاغیرون بیر بیره عباسین ادین
ال پیغمبر عطشدن یانور الله بو گئجه
*****
نهر علقم او طرفده اخوری ئوز باشینا
ال هاشم بو طرفده بویانوب گوز یاشینا
تاپا بیلمور سو رقیه صود امر قارداشینا
ال پیغمبر عطشدن یانور الله بو گئجه
*****
کیم گوروب نامه یازانلار سویی کسسون قوناقا
بارماقین خورداجا قزلار قویوب عطشان دوداقا
ساقی تشنه لبان باشینی سالمیش اشاقا
ال پیغمبر عطشدن یانور الله بو گئجه
*****
گلستان قالسا سوسوز غنچه صولار گل سارالار
چاره یوخ عترت طاها گرک عطشان قالالار
بیر بیرین خیمه سقاده قوجاقلور بالالار
ال پیغمبر عطشدن یانور الله بو گئجه
*****
قلبلر قانه دونوبدی نیه دونمور قانا سو
خیمه ده گوز یاشی اخدیقجا اخور هر یانا سو
عمه سو . باجی سو . سسلور بالالارسو . انا سو
ال پیغمبر عطشدن یانور الله بو گئجه
*****
کبریا اهلی لب عطشان . سو ایچور اهل ریا
ایلمور فاطمه دن کوفه و شام اهلی حیا
هشتم ماه محرمدی قیامتدی و یا
ال پیغمبر عطشدن یانور الله بو گئجه
*****
هاردادی ساقی کوثر ائده بو مشکلی حل
الینوب تحت نظر دایره خیمه و تل
زور و زر بنده لری قویمادیلار دینه محل
ال پیغمبر عطشدن یانور الله بو گئجه
استاد کلامی زنجانی
اگر قبلا در بیان ثبت نام کرده اید لطفا ابتدا وارد شوید، در غیر این صورت می توانید ثبت نام کنید.