"واحسرتا آیردی اجل یاری یاریدن" احوالات دفن حضرت فاطمه زهرا (س) من کلام مرحوم حاج حیدر شبگرد(خوندل) تبریزی

واحسرتا آیردی اجل یاری یاریدن
زهرانی آلدی حقّی گیدن شهریاریدن
ایتمیشدی چون وصیّت اوزی ویردی غسلینی
دفنین ایشیت قلمده اولان اختباریدن
زهرانی تا یتوردیله قبرین کنارینه
باخدی مزاره ساقی کوثر کناریدن
توکدی عذاره گوزیاشینی، یاندی، آغلادی
بیر آه سرد چکدی دل داغداریدن
امر ایلدی جریده لری ایتدیلر خموش
کام آلدی شب او سرور شب زنده داریدن
شهر مدینه خلوت و خاموش و بی فروغ
عالم سکوت محض شب مرگباریدن
محبوس سینه لرده نفسلر نه وار مگر
کیم آیریلور بو دامگه مستعاریدن

آغلاردیلار صحابه، ولی شمع تک خموش
آلموشدی مشق گوزلری ابر بهاریدن
سلمانیدی اباذر و مقداد بُلمورم
تشییع ایدن او بانوی والاتباریدن
قبرین کنارینه یتیروب قویدولار یره
افسرده دل او حادثه ی ناگواریدن
امر ایلدی امام که مندن کنار اولون
یوز دوندرون بو درد و غمی بی شماریدن
پیغمبرین قیزین من اوزوم قبره تاپشورام
پیغمبری خلاص ایلیوم انتظاریدن
امر امامه ایلدی اصحاب امتثال
آیریلدیلار او محفل پر آه و زاریدن
تا بزم راز خلوت اولوب غیر قالمادی
آیریلدی صبر و تاب او شه بردباریدن
بیر قالدی نعش فاطمه، بیر مرتضی علی
دریای صبری سالدی بو غم اختیاریدن
حسرتله باخدی بیر او یارالی جنازیه
آخدی سرشکی دیده ی گوهر نثاریدن
گوردی خزان لهیبی ایله سولدوروب گُلین
ذوق و صفا علاقه کسوب لاله زاریدن
بیر قدر درد دل دیدی، بیر قدر آغلادی
اسگیلمدی شراری دل پرشراریدن
زهرانی بیر محبّتیله باسدی باغرینا
هجرانه توشه اخذ ایلدی وصل یاریدن
بیرده سخلدی بیر بیرینه داغلی سینه لر
آیریلدی، آیریلانمادی مولا فشاریدن
سسلندی قالدی فاطمه دیدار محشره
بو آیریلیق علینی سالار اعتباریدن
ای کاش اجل گلوب منیده راحت ایلیه
سنسیز نه خیر عالم ناپایداریدن
دنیایه باخ علی اُلومون آرزو ایدر
فریاد، گردش فلک کجمداریدن
زهرا جنازه سی نیه گیزلینجه دفن اولور
بُلمز هامی بو سرّی سوروش هوشیاریدن
دشمن هراسی بیر نچه مخطور ناگوار
خیبرشکن علینی سالوب اقتداریدن
مجبور اولوب بتولیدن اوز الفتین کسوب
مرگ ایتدی عندلیب گُلی جور خاریدن
آق زلفینی، سولان یوزینی قویدی توپراقا
تا اولدی روزگار علی شام تاریدن
فرمایش ایتدی فاطمه شرمندیم اوزوم
مجروح سینه دن، بدن زخمداریدن
بیر خواهشیم بودور که علینی گذشت ایله
چوخ دردسر یتوب سنه بو شرمساریدن
سن مندن اوتری جانیوی سالدون بلالره
چکدون او قدر رنج و اذیّت شراریدن
دویدون حیاتیدن، اوزیوه ایستدون اُلوم
هر بیر فریضه دن صورا پروردگاریدن
گیتدون اوزون، عم اوغلیوی قویدون شکسته دل
هجرون قرار آلار بو دل بی قراریدن
پیغمبرین حضورنه مندن یتور سلام
عرض ارادت ایت بو ملول و فگاریدن
عرض ایله غصب اولوندی جفائیله حقّیمیز
آگاه قیل او شاهی سرانجام کاریدن
هر شکوه یا گلایه آپارسان آپار ولی
هرگز آپارما آد ستم آشکاریدن
سیلی حکایتین، در و دیوار صحبتین
مستور ساخلا سن او شاه تاجداریدن
کشف ایتمه اسدی گلشنه باد جفای خار
بیر غنچه پرپر اولدی بیزیم شاخساریدن
امّا دیسن دی من ایله دلدن سیزیلدادیم
آلدیم توان و طاقتی هر رهگذاریدن
آخِر ایویمده آغلاماقا مانع اولدولار
صحرانی اختیار ایلدیم اضطراریدن
تنگ ایتدیلر بو وسعتیله یر یوزیون منه
کسدیم علاقه جبریله دار و دیاریدن
گَلدیم حضوریوه بُله سن سرگذشتیمی
باخسان یارالی جسمیمه نیلی عذاردن
امّت رعایت ایتمدی شرط امانتی
گویا یوخیدی واهمه روز شماریدن
خوندل بولار ذخیره دی فردای محشره
نه شعریدن حساب ایله، نه شاهکاریدن

مرحوم حاج حیدر شبگرد "خوندل" تبریزی