"بورا نینوادی زینب، بومکان نواسیز اوْلماز" شعر از مرحوم رحیم منزوی اردبیلی

بورا نینوادی زینب، بومکان نواسیز اوْلماز

آدی کربلا اوْلان یر، بولورم بلاسیز اوْلماز

بوزمین پاکه قانیم وئره‌ر آیری بیر اثرلر

سوْرا قانلی تُربَتیمده‌ن گل آرزو در‌للر

اؤپوب ال به ال جهاندا، اوْنی تُحفه گؤندرللر

اوْلا هر مریضه قسمت، مرضی شفاسیز اوْلماز

من اؤزوم خلیل عشقم، بورادور منای عشقیم

اوْ فرات زَمزَمیمدیر، بومکان صفای عشقیم

بوگل اوزلی اکبر اوْغلوم، اوْلاجاق فدای عشقیم

کی خلیل اوْلان مناسیز، بومنا فداسیز اوْلماز

بومکاندا سن قوْناقسان، منیم اصلی مسکنیمدیر

بولور‌م ندور حدودی، هارا عین مدفنیمدیر

باخ اوْ تلّ سند‌ن اؤتری، بوچوخور مکان منیمدیر

هارا سالک طریقت، گیده رهنماسیز اوْلماز

اوْ فراتی کی گؤرورسن، بیزه گؤرسه‌دیر سیاهه

منی سسلییور یتیرسوْن، سؤزونی بوبی‌پناهه

کی گلین بیرآزسویومدان، آپارون اوخیمه‌گاهه

دوْلانار مباح اوْلان سو، ستم وْجفاسیز اوْلماز

اوجالوب سسی فراتین، ولی چوخلی باکنایه

سویونی تعارف ایستیر، ائده سود امربالایه

کی گل ایچ نقدر ایچیرسن، سوْرا ائیلمه گلایه

قدغن اوْلاندا گلسن، بوْغازون یاراسیز اوْلماز

باجی من کی شش جهات وْدوجهانه پادشاهم

گر‌ک آلتی گوشه بیر قبر، ائده‌لر منه فراهم

اوره‌گیم چوْخ ایستیر اوْردا یاتاق اکبریله باهم

ائله بیرمزاریم اوْلسا، بئله مه لقاسیز اوْلماز

باجی مند‌ن اؤتری شمره سن اوجاتما دست حاجت

منی خنجرآلتدا گؤرسوْن، اوْنا ائیله‌مه سماجت

دم خنجره ال آتما، الون ائیلمه جراحت

ائله نطفه‌ی زنانین الی چون خطاسیز اوْلماز

شعراز: مرحوم رحیم منزوی اردبیلی