"علی اکبر نجه لیلا سنون تک گلدن آیریلسون" وداع حضرت علی اکبر (ع) از مرحوم سیدرضا_حسینی_سعدی_زمان
وداع حضرت علی اکبر علیه السلام
از سیدرضا_حسینی_سعدی_زمان
علی اکبر نجه لیلا سنون تک گلدن آیریلسون
جفآی خاریله مشکلدی گول بلبلدن آیریلسون
سنین عشقینده مجنونم اگر چه لیلی مشهورم
ایکی جسم ایچره بیر روحوخ ولی صورتده مهجورم
اورکدن چکمورم ال نیلیوم یوخ چاره مهجورم
محال ایشدور غم هجرین ئولنجه دلدن آیریلسون
دوا یازموب طبیب عشق درد و رنج هجرانه
ئولومدور چاره سی دل مُلکینی هجر ائتسه ویرانه
آنان لیلا دوشر صحرایه سنسیز مثل پروانه
گرک عالم علوم عشقیده جاهلدن آیریلسون
یارانماز علم عشقی لوح عمره منشی عادل
منی گوردی سنون عشقینده عالی رتبیه قابل
ازل بیر گوندن اولدوق سن منه منده سنه مایل
ئولومدن سختیدور مایل علی مایلدن آیریلسون
نکات عشقی کامل بُلماقا بیر کیمسه دور لایق
ره جاناندا اولسون عشقیله غم چکماقا شایق
بلا یتدوقجا شدت اولماسا صبری غمه فایق
قصوری وار او عشقین دسته کاهلدن آیریلسون
یتوب وصل آخره معلوم اولان ایام هجراندور
فراق جاودانی ضجه دلدن نمایاندور
پریشان زلف مشکینین کیمی گوگلوم پریشاندور
پریشان دل نجه آیا سیه کاکلدن آیریلسون
اورکده اکمیشم نخل وفا ای ماه عالمتاب
او نخلی ایتمیشم خون دلیله هر زمان سیراب
یتوبدور حاصله ایمدی ویرور بر دیده دن خوناب
ئولنجه قویمارام نخل وفا حاصلدن آیریلسون
خیال دانۀ خالین سالوب گوگلوم قوشون دامه
واریمدور اضطراب از بس دونوب الف قدیم داله
چکوب بو اضطراب دل منی بسمل کیمی شامه
گورن یوخ اضطراب دل علی بسملدن آیریلسون
گوزوم یاشی آخار دریا کیمی دائم بو سوداده
سینیق کشتی کیمی جسمیم قالوب زخار دریاده
وصالین بیر سنق فلکه علی ساحلدی دنیاده
یتوبدور ساحله ایمدی نجه ساحیلدن آیریلسون
سر زلفین کیمی لیلاده باخ حال پریشانه
گیدورسن ایمدی که گَل مشکبو زلفین ائدیم شانه
الیم تیترور ووراندا شانه زلف عنبر افشانه
مبادا نظمیدن دوشسون علی تل تلدن آیریلسون
نجه اکبردن آیریلدی «حسینی» بُلمورم لیلا
دالنجا باخدی آغلارگوزلی چکدی بانک واویلا
او محفلده که عاشق ایلیه معشوقیله ماوا
دوزر مرگه ولی دوزمز همان محفیلدن آیریلسون
مرحوم سیدرضا حسینی سعدی زمان
اگر قبلا در بیان ثبت نام کرده اید لطفا ابتدا وارد شوید، در غیر این صورت می توانید ثبت نام کنید.