"دور یاتما بو قان ایچره اماندور آتام اوغلی" استاد مرحوم ذهنی زاده

دور یاتما بو قان ایچره اماندور آتام اوغلی

قارداش غمی قارداشه گراندور آتام اوغلی

امـدادووه ایمـدی منـی سن سسلمدون بس 

گلدیم گوزون آچ بیرده منیم ویر سسیمه سس 

آچ گوزلرووی گور باشون اوستونده بو بی‌کس

کیمدور که سنه ناله کُناندور آتام اوغلی

یاندیم سنی من نزع روان اوسته که گوردوم 

تیر اجلـون راست نشان اوسته که گوردوم

بیر حالته قالدیم سنی جان اوسته که گوردوم

باخسان اؤلوم آثاری عیان‌دور آتام اوغلی 

قان ایچره خسوف ایلدی تا ماه جمالون 

آغلار گؤزومـه عالمی تار ایتدی ملالون

هـر قـدر وارام دلـده مؤثّردی بو حالون

شُغلوم سنه فریاد و فغان‌دور آتام اوغلی 

گورکیـم گـوروب عالمده بیله حال غم‌افزا 

سو اوسته بو حالیله سوسوز جان ویره سقّا

سن گیتدون اوزون قالدی دیلیمده آدون امّا

هـر لحظه منـه ورد زبان‌دور آتام اوغلی

گیتدون دیمدون قارداشیمون دشمنی چوخدور 

یالقوزدی اوغولسوزدی داخی کیمسه‌سی یوخدور

قارداش چاغوراندا سسیمه سس ویرن اوخدور

ایجاب ایئدنیم تیغ و سِناندور آتام اوغلی 

همـدردیمیــدون آگهیــدون درد دلیمـدن 

گیئتدون ایلیم آرخام الیمی اوزدون ایلیمدن 

کسکین قلجیم دوشدی بوگون قارداش الیمدن

واضحدی بو مطلب نه نهاندور آتام اوغلی

دشمن یری‌وار یانسا بو احوالیمه قارداش 

امّـا دیمورم باخ منیم اؤز حالیمه قارداش

رحم ایئت گوزی یولدا قالان اطفالیمه قارداش

جـام اَلـده تمامـی نگرانـدور آتـام اوغلی

نولدی سنه سو وعده‌سینون فکرین آتوبسان 

بیر مشگ سو اوسته سوکیمی قانه باتوبسان 

ضعف ایلموسن قان آپاروب یا که یاتوبسان 

دور قارداشوون حالی یاماندور آتام اوغلی

بـو آز سپهیلــه کـه علمداریمــدون سن 

بــولمزدیله مغلــوب منـی لشگر دشمن 

گیئتدون کیمه بس تاپشوروم آیا عَلَمی من 

بیـرق سپهـه عُمده نشاندور آتام اوغلی

سرداریمدون سن منیم ای کان شجاعت 

سندن الیمـی اوزدی بو بیرحم جماعت

صبر ایله دالونجـه گلورم منده بوساعت

تأخیـرده یوخ خَیْـر زیاندور آتام اوغلی 

تـا اَلـده اَسَردی علمـون پرچمی عبّاس 

ایئتمزدی باجون زینب اسارت غمی عبّاس 

امنیّتیـدی عترتیمــون عالمــی عبّـاس

سنسیز اولارا سخت زماندور آتام اوغلی

جسمون سو کنارینده سینیق زورقه بنزر 

دور سالما بو گرداب خطرناکیده لنگر 

چک ساحله طوفانه دوشوب آل پیمبر

دریـای بـلا مـوج زنانـدور آتـام اوغلی

ای تَرک سر و جان نه صداقتلو جوانسان 

پروانـه کیمی شمع محبّتـده یانانسان 

آخـر نفسونـده گینه منـدن نگرانسان 

حاشا نظرونده سر و جان‌دور آتام اوغلی

نه قارداشیدون من بولورم اؤزگه‌سی بولمز مین عالم اولا عالمه مثلون داخی گلمز

بیر قدّی که قارداش اؤلومی بوکدی دوزلمز

بو مسئلـه مشهـور جهان‌دور آتام اوغلی

دورت قارداشی بیر گونده اؤلن قارداشون حالی 

نـه حالــه قالـور اهل دل ایستر اولا حالی 

بِخصـوص کُمَکسیـز قالالار اهـل و عیالی

بیر یرده که وحشتلو مکاندور آتام اوغلی

شل اولسون او اواللّه که صول و صاقووی سالدی 

بـو اللّــری کسـدی قولومون قوّه‌سین آلدی 

سندن صورا دردیم چوخالوب چارم آزالدی 

گوزدن جگریم قانی رواندور آتام اوغلی

هانســی ستمیلــه اؤلــن آیــا سنه بنزر 

سیننده چاتوب باش باشا اوخ مخزنه بنزر 

جسمون باخورام بیر پوزولان گلشنه بنزر

باشدان باشا پامالی خزان‌دور آتام اوغلی

از بس اوخی اوخ اوسته ووروب لشگر اعدا 

جسمون پر آچوب بس هانی شهپرلرون آیا 

ای اوج رشادتــده هنـر صاحبـی عَنقا 

همّت گونی وقت جَوَلاندور آتام اوغلی

غم چکمه اَلون یوخ سیله‌سن قانی گوزوندن 

من سیلّم اوزوم حالـووه چوخ یانّام اوزوندن

قـول بوینـووا سالاّم اؤپرم قانلو یوزوندن

وار اوزگه مرامون گینه آندور آتام اوغلی.

شاعر استاد ذهنی زاده.