احوالات حضرت علی اصغر از مرحوم شهاب
- علی اصغر(ع)
ای غنچه ی خندان لایلای علی لایلای
جانیم سنه قربان لایلای علی لایلای
پوزقون گوروب حالون یانّام علی اصغر
رنگون سوسوزلوقدان سولموش گله بنزر
یوخدوم سودوم آخِر نیلوم علی اصغر
لایلای علی لایلای لایلای بالام لایلای
سالدی منی دلدن درد و غمون آخِر
اظهار ایدوم حالون واردور کیمون آخِر
یوخدور علی اصغر عبّاس عمون آخِر
لایلای علی لایلای لایلای بالام لایلای
چوخ گل خزان اولدی سولدی بو گلشنده
بو گون سوسوز گل تک پژمرده سن سنده
گورّم سولان رنگون یانّام اوغول منده
لایلای علی لایلای لایلای بالام لایلای
بو گون اوغول بولّم اوچ گوندی عطشانسان
بیر دسته سنبل تک بی تاب و لرزانسان
حقّون وار آغلارسان بیله پریشانسان
لایلای علی لایلای لایلای بالام لایلای
قوم ستم پیشه کسدی سو یولّارین
توکدیله قانلارین سو تک جوانلارین
ویردی عمون عبّاس سو اوسته قولّارین
لایلای علی لایلای لایلای بالام لایلای
سو فکرینی باشدان بو گون اوغول آت سن
بیر لحظه آرام اول لایلای دیوم یات سن
نه سو دیوب آغلا نه قانیوه بات سن
لایلای علی لایلای لایلای بالام لایلای
چوخ جستجو قیلدوم سو صحبتین ایتدوم
بو گون سودان اوتری هر خیمیه گیتدوم
سن تک سوسوز گوردوم هر بیر کسه یتدوم
لایلای علی لایلای لایلای بالام لایلای
ایتدوقجا سن ناله یانّام اوزوم یانّام
قالماز علی اصغر دلده دوزوم یانّام
گورّم سنی آغلار آغلار گوزوم یانّام
لایلای علی لایلای لایلای بالام لایلای
هر بیر آنا گورسه اوغلین اوغول سن تک
واردور یری یانسون قان آغلاسون من تک
غنچه لبون سولموش افسرده گلشن تک
لایلای علی لایلای لایلای بالام لایلای
آز آغلا آز یاندور من بیکس و زاری
بیر بیله گوزیاشون ایتمه یوزه جاری
آرام دوت آخِر یات بیر سنی تاری
لایلای علی لایلای لایلای بالام لایلای
«شهاب» بو غمده آغلا فغان ایله
هر بزم ماتمده اشکون روان ایله
بو سوز گوزل سوزدور ورد زبان ایله
لایلای علی لایلای لایلای بالام لایلای
اگر قبلا در بیان ثبت نام کرده اید لطفا ابتدا وارد شوید، در غیر این صورت می توانید ثبت نام کنید.