"بو قاره علم لر کی وار آثار حسیندور" شعری از استاد اعظمی
🌺﷽یااباعبدالله حسین(ع)🌺
بو قاره علم لر کی وار آثار حسیندور
اسلامی بیله زنده ایدن ثار حسیندور
مشهوردور خلق ایچره حسین عشق طبیبی
عالمده اودور چوخلاری بیمار حسیندور
خضر آختارار هرچند هامی دهریده،اما
چوخ خضر بوگون تشنهء دیدار حسیندور
باخ شأنه حسین قبرین ئوپن حشرده یانماز
خوش حالینه هر کیمسه کی زوار حسیندور
بیر باب الحوائج کی آدی حضرت عباس
اول عز و شرف صاحبی سردار حسیندور
زینب اورگینده یازیلوب سر شهادت
گور دهریده زینب نجه دلدار حسیندور
تاپشوردی حسین زینبه بو پرچم دینی
تا بلسون هامی زینب علمدار حسیندور
دین اوسته حسین گیچدی اوگون ماملکیندن
حیرتده قویان عالمی کردار حسیندور
قارداشلارینی سودامرین پیر و جوانین
قربان ویرن اسلامه فقط کار حسیندور
آخدوقجا حسین قانی یازوبدور یره یاحق
دین پایه سینی محکم ایدن ثار حسیندور
عالمده کسیک باشیله قرآن مبینی
پاینده ایدن نطق گهربار حسیندور
بلسونله حسین مکتبینه درسه گلنلر
چکسون هامی دین غیرتی گفتار حسیندور
دین غیرتی اوستونده حسین قانه بویاندی
هر کیمسه ده دین غیرتی وار یار حسیندور
چون آتدی گوزیندن هامونی ساخلادی دینی
حشره کیمی معبود نگهدار حسیندور
عالمده دیمه بیکس حسین،عالم اونوندی
سکان سما یار و هوادار حسیندور
عرشه چکیلوب قاره حسین قانه باتاندان
گوگلرده ملکلر ئوزی غمخوار حسیندور
آیا بلوسن کعبه نیه قاره گیوبدور
یعنی کی خداوند عزادار حسیندور
دین مشعلینی ساخلادی تاریک زماندا
شعله سالان هر محفله رخسار حسیندور
بول قیمتینی حرمتینی ساخلا عزیزیم
بو قاره علملر کی وار آثار حسیندور
بو مجلس ماتمده مؤدب گلوب اگلش
زهرا دولانور چون بورا دربار حسیندور
غفلت ایلمه گل ایله عقبایه تجارت
ویر اشک متاعین بورا بازار حسیندور
عالمده حسینیلر حسین امرینه باخسون
سرمشق ویرن عالمه رفتار حسیندور
هر کیمسه حسینون ایده گر خوار عزاسین
حشره کیمی واللهی ئوزی خوار حسیندور
عزت تاپار هر کیمسه ویره زینت عزایه
خدمت ایلین ماتمه انصار حسیندور
وار قیمتی عالمده عزادار حسینون
خوشحالینه هر کیمسه عزادار حسیندور
سن قاره علملردن الون(اعظمی)ئوزمه
بو قاره علملر کی وار آثار حسیندور.
ﺍَﻟﺴﱠﻼﻡ ُﻋَﻠَﻰﺍﻟْﺤُﺴَﯿْﻦ َﻮﻋَﻠﻰ ﻋَﻠِﻰ ِّ ﺑْﻦ ِﺍﻟْﺤُﺴَﯿْﻦَِ
ﻋَﻠﻰﺍَﻭْﻻﺩﺍﻟْﺤُﺴَﯿْﻦ ِﻮ ﻋَﻠﻰﺍَﺻْﺤﺎﺏ ِﺍﻟْﺤُﺴَﯿْﻦ
اَللّهُمَّ عَجِّل لِولیّکَ الفَرج.…اَللّهُمَّ عَرِّفْنی حُجَّتَکَ.
اگر قبلا در بیان ثبت نام کرده اید لطفا ابتدا وارد شوید، در غیر این صورت می توانید ثبت نام کنید.