"گلوبدی بیرگون علی گوردی رو به قبله یاتوب" احوالات حضرت زهرا (س) من کلام حاج_حیدر_خوندل
احوالات حضرت زهرا (س) من کلام #حاج_حیدر_خوندل
گلوبدی بیرگون علی گوردی رو به قبله یاتوب
کسوب علاقه بدندن قوای جسمانی
گورنده بی حرکت همسرین او سرور دین
نه حاله قالدی بولر اهل دل او معنانی
بو نیّتیله او خاموشی بیر دانیشدیرسون
گلوب تکلّمه بو سوزلر اولدی عنوانی
خطاب ایدوب که دور ای قائد الصّلاه قیزی
رعایت ایت بو علیّ غریب و تنهانی
دیدی دوباره دور ای حامل زکات قیزی
گوزون فداسی گوز آچ ایتمه نقض پیمانی
اوچومجی دفعه بویوردی عم اوغلوام زهرا
قسم علاقوه رد ایتمه بو تمنانی
ندا ندای علی فاطمه جواب ویرن
منم که مشکله سالام بو امر آسانی
بو سوزده گوزلرین آچدی بتول نازیله
تبسمیله ایدوب شاد او غملی مولانی
دیدی عم اوغلی بیله آغلاما سنه قربان
گوزموده گوندوزومی ایتمه لیل ظلمانی
حیات و مرگی کناریمده روبه رو گورورم
گل ای کرامتی عاجز قویان مسیحانی
بهشتیدن منی دنیایه ایلدون معطوف
زیارتوندن اولار بو نقصه جبرانی
هزار روضه ی رضوان فداسی بیر نگهون
گورر دل اهلی جمالوندا بسط عرفانی
سن اولماسان نه بهشت و نه کوثر و نه قصور
تاپار سنیله صفا خلد حور غلمانی
جلال بارقه ی ذوالجلالی سنده گورر
ویرر کلیمه تجلای طور سینانی
سنه مطیع اوامردی قابض الارواح
اطاعت امریوه ایلر او پیک رحمانی
گلوبدی منتقل ایتسون منی بو عالمدن
بقایه چونکه بو عالمدی عالم فانی
ولی فراقیم اگر سخت مشکل اولسا سنه
حضوریون منه وار مین بهشت رجحانی
سن اولماسان منه سن سیز بهشت اولار زندان
بتول نیلوری سن سیز بهشت رضوانی
عم اوغلی امر سنون دور نه اولسا منظورون
اوالیمون سنه وار بیر خضوع شایانی
اگر بو مرحله ده خواهشون حیاتیم دی
بتول جانیله اجرا ایدر او فرمانی
عم اوغلی من سنی ترک ایتماقیم دگل آسان
بو آیریلیق دگی بیر روح ترک ایدر جانی
حسینیله حسنون زینبیله کلثومون
من اولماسام اولارین کیم اولار نگهبانی
بو قدر آغلاما آغلار گوزون فداسی اولوم
ایدر گوزون یاشی شرمنده بحر عمّانی
حیات چشمه سی جاریدی هر دمونده ولی
یازوب فنایه قلم کل من علیهانی
اجازه ویرسن اگر چوخ یورولموشام منده
گیدوب بهشتده اولّام رسول مهمانی
بویوردی فاطمه بیر اود آلیشدیروب دلده
فراق سوزی آشوب حدّ و مرز طغیانی
فقط بو گوز یاشی هر دم ایدر اونی خاموش
بولر فراقه گرفتار اولان بو ایمانی
چتیندی داغ جوان لیک سخت تر بولورم
خدایه آند اولا من فرقت احبّانی
بو آیریلیق ایله بیر اودّدی حشره تک سونمز
یانار یانار کول ایلر یاندیرار تن و جانی
غمیم همیشه لیق اولدی سنون فراقوندا
سزادی اشکیم ایده شرمسار دریانی
اولار بو سرّ گجه یاتمیانلارا روشن
نیه منه گیجه لر اولدی لیل ظلمانی
حاج حیدر خوندل
اگر قبلا در بیان ثبت نام کرده اید لطفا ابتدا وارد شوید، در غیر این صورت می توانید ثبت نام کنید.