"جان ویرنده غریبانه زینب" شعر از سید بشیر حسینی میانجی
"شعر از سید بشیر حسینی میانجی"
جان ویرنده غریبانه زینب
نی کیمی گلدی افغانه زینب
شامیده یئددی قارداشدان ئوتری
سسلنوردی یانا یانه زینب
بیر نفر یوخ منی یاده سالسون
باشیمی دیزلری اوسته آلسون
یا حسین یا حسین یا حسین جان (2)
یاز بولودلاری تک دولموشام من
آغلاییب گول کیمی سولموشام من
گولمیوبدور یوزوم اللی ایلده
یئش یاشیمدان یتیم اولموشام من
جان وئرنده آنام آغلاییردی
منه باخوب ئورک داغلییردی
یا حسین یا حسین یا حسین جان (2)
یارب هر باجی اولسا وفالی
دوشمه سین قارداشیندان آرالی
گورمه سین قانلی کوینک منیم تک
گئتمه سین قبره قلبی یارالی
هانسی باجی منیم تک چکوب غم
قارداش هجرینده قدین بوکوب غم
یا حسین یا حسین یا حسین جان (2)
آلله آگاه دی تاب وتبیمدن
دویمادیم نغمۀ یا ربیمدن
دوزدی غملر منی یوردی اما
چکمدیم ال نماز شبیمدن
قارداشیم تک نمازی دیریتدیم
دینِ شاه ِ حجازی دیریتدیم
یا حسین یا حسین یا حسین جان (2)
بیر عومور سینه می داغلادیم من
باشه دائم قرا باغلادیم من
هر مکاندا سرین سو گوررکن
یا حسین سسلدیم آغلادیم من
سو کیمی آخدی بو گوز یاشیم وای
وای سوسوز جان ویرن قارداشیم وای
یا حسین یا حسین یا حسین جان (2)
یوخ گلن کربلانین یولوندان
نه ساقیندان گلن نه صولوندان
کاش یانیمدا اولیدی ابوالفضل
صون چاقیمدا ئوپیدیم قولوندان
کربلانی یولوندا گوزوم وار
دیلده عباسه چوخلی سوزوم وار
یا حسین یا حسین یا حسین جان (2)
شاهدیم خالق لم یزلدی
هرنه گوردوم یولوندا گوزلدی
جان ویرینجه سنه آغلادیم من
چون سنه آغلاماق خیر عملدی
سنده گل باجیوا آغلا قارداش
جان ویرور گوزلرین باغلا قارداش
یا حسین یا حسین یا حسین جان (2)
سن وفا پالتارین سویما قارداش
زینبوندن هله دویما قارداش
هئچ کسیم یوخدی جان اوسته یم من
گل بو غربتده تک قویما قارداش
گوز یاشین سیلمه دیم آیریلیقدان
آیریلا بیلمه دیم آیریلیقدان
یا حسین یا حسین یا حسین جان (2)
یا حسین سید علیاره اول یار
بانی اولدی یازیلدی بو اشعار
هم اونی همده سید بشیری
باجیوین قبرینه ایله زوار
قلبیمیز غصه دن داغلانیبدی
چون دمشقین یولی باغلانیبدی
یا حسین یا حسین یا حسین جان (2)
اگر قبلا در بیان ثبت نام کرده اید لطفا ابتدا وارد شوید، در غیر این صورت می توانید ثبت نام کنید.