"او دم کی حرمله ننگین اله تیر و کمان آلدی" احوالات حضرت علی اصغر (ع) از استاد رحیم منزوی اردبیلی
احوالات حضرت علی اصغر (ع) از مرحوم استاد رحیم منزوی اردبیلی
او دم کی حرمله ننگین اله تیر و کمان آلدی
ملک‌لر ضجه چکدی شیعه‌لر خط امان آلدی
حقیقت گورسنـر قلب سلیم و چشم بینایه
ازلدن حرمله کور اولدی ساتدی دینی دنیایه
خریـدار بهشته بیـر اووج قان الده سرمایه
حسینون سودامر سربازی جان وئردی جنان آلدی
دیزین برکیتدی یئرده اوخ آتان بیر پهلوان مثلی
کمان پرتاب و زه تابیده اوخ برق جهان مثلی
هدف بیر آلتی آیلیق سودامر برگ خزان مثلی
حسینون خیری اولسون غنچه وئردی گلستان آلدی
گؤر اوچ پر اوخ سودان آیـری دوشن بیرماهیه نیلر
دگه دیوار مسجدده قانادسیز یاهویا نیلر
ابوالفضلی ییخان بیراوخ گؤرون شش ماهیه نیلر
باش آیریلدی بدندن قلب زهرادن توان آلدی
اوخی چکدی بـوغازیندن آتوب قان مثل فواره
دمادم دولدوروب اؤوجین ائدوب عرضه خریداره
جنازه اللری اوستـه قالوب میداندا آواره
ندای احسن احسن ذات حقدن ناگهان آلدی
آتانون اللری قان، یوز گؤزی قان، آغ محاسن قان
بالانون ایسلادوب آغ دوشلوگین زیبا لباسین قان
اولوب باب الحوائج ایلدی تضمین بقاسین قان
عموسی حضرت عباس تک نام و نشان آلدی
نظر اطرافینه سالدی اوزین تک گوردی میداندا
دئدی قارداشلاریم اوغلوم خدا غرق اولموش آلقاندا
قالان بیر سودامـر سربازیمیـدی ذیل پیماندا
اودا صدساله درسی آلتی آیدا بی‌زبان آلدی
بو غمدن پارچالانمیشدی نه طاقتده داغ اولسیدی
بهارون فصلی سولمیشدی نجه عالی باغ اولسیدی
بالام ال اوسته قالمازدی ابوالفضلیم ساغ اولسیدی
گوروب قارداش‌سیزام اطرافیمی بو قوم کوفیان آلدی
اؤزون محشر گونی ای منتقم قیل عدلیلن دیوان
بو مـن او حرمله بو اصغر مظلوم او ناحق قان
ساتان من مشتری سن قان متاعیم قیمتی رضوان
اوزون وئر خیرینی یارب ساتان ساتدی آلان آلدی
بالا از بسکه چیرپیندی آتانون سینه‌سی اوسته
وئروب جان مرغ بسمل تک ولیکن قول قاناد بسته
قویوب یوز خیمیه ساری آتا خسته بالا خسته
اوزاقـدان رمـزی اول زینب بی‌خانمان آلدی
ئوره‌کلندی دئدی قارداش گل خندانوه قربان
سووا عطشان گئدوب عطشان گلن مهمانوه قربان
الـون اوستـه ملک‌لـر آغلیـان قربانووه قربان
بودیلسیز نیلمیشدی دشمن آخر قانه قان آلدی
دئدی سن اولماسیدون خیمیه باجی گلنمزدیم
آناسـی خیمه‌دن باخسیدی من تَلی اننمزدیم
بو حالیله کی سن گوردون گؤزونه گورسننمزدیم
ربابه درسی سن وئردون فلک سخت امتحان آلدی
وداعین وقتی دور باجی فراقه قوی ائدوم تمکین
عیـادت ایلیـوم سجادیدن دردی تاپا تمکین
مریضـون یاننه گئتمکده اما وارگوزه‌ل آئین
گوررسن هـر کسی بیر هدیه در حد توان آلدی
مریضه دسته‌گل باغلالا بیرخوش رسم و عادتدی
اودور سجـاده گتـدیم بـو گلی وقت عیادتدی
آپار وئر ایلسون وئرسون سیزه بو یاخشی فرصتدی
مریض ایلر گلی اوندان گوررسن دیگران آلدی
وئرنده هر قیزا اما دئنن آرام آل آغوشه
یواش باس باغریوا دیسگینمسین الان گئدوب هوشه
آتـوب دوتما بوغازیندن دوباره قان گلر جوشه
وئـرون الدن الـه بلکـه ربـاب مهـربان آلدی
آلوبلا قانلـی قنداقـی اؤپـن الـدن اله وئردی
بوغازینون یاراسین کیم گوروب زلفین یئله وئردی
ربابـه نوبـه چاتدی شاعیره مولا صله وئردی
سیزیلتیلان ایله نوحه دئدی فیض کلان آلدی
دئدی گر چه غموندن اؤلمدیم من زنده‌یم اوغلوم
نقدری کی آدون اوستومده وار پاینده‌یم اوغلوم
قصوریم اولدی سندن حشره‌جک شرمنده‌یم اوغلوم
منیم سینم‌ده‌سن بخت اولدوزیدون آسمان آلدی
یقینیمدور گجه چوخ اینجیمیشدون ایندی دینجلدون
یانوردون صبحه‌جک آهون اُوخیله قلبیمی دلدون
ائوون آباد کوسموشدون گینه آغوشیمه گلدون
کأنه آلتی آیلیق دستمزدیـن باغبان آلدی
مرحوم رحیم منزوی اردبیلی
اگر قبلا در بیان ثبت نام کرده اید لطفا ابتدا وارد شوید، در غیر این صورت می توانید ثبت نام کنید.