"دیده عالم حسین تک مرد میدان گور میوب" شعر از حاج ولی الله کلامی زنجانی
دیده عالم حسین تک مرد میدان گور میوب
بیر بیله ازاده رهبر چشم دوران گورمیوب
ویردی الله کا ئناته جلوه اون دورت نوریدن
افضل ایتدی اولارین قدرین ملکدن حوریدن
پنج تن بزمی حسین حسنیله دولدی شوریدن
باشدی زهرا اوغلونون کربو بلاسی طوریدن
حیف او طوری حضرت موسی بن عمران گورمیب
دوره گردم من محبت باغینون سیاحیم
معنویت بزمینون پروانه مصباحیم
گوز یاشیم لشگلر اورکلر ملکینین فتاحیم
مدعی چوغ طعنه ورما من حسین مداحیم
بیر گلوم وار که گلدن هیچ گلستان گورمیوب
گزسه عیسی گویلری بیر بیر الده گون بیر الده آی
کل عالمده تاپا بلمز بیزیم مولایه تای
دورسا بیر صفده گوزللر سن حسینی باشدا سای
ویردی الله سوم شهبا اونی زهرایه پای
نه بشر مثلین اونون حوری و غلامان گورمیوب
روز محشرکه اولار مردم بهشته مشتری
جمع اولار دور حسینه بیر محبت لشگری
حوری لر سسلر گلون گیتمز حسین عاشقلری
((قدر زر زرگر شناسد قدر گوهر گوهری))
مقتدر شاهدا بو شخصیتده سلطان گورمیوب
نقل ایدور زینب که عمرنده بابام شیر خدا
ئوز آدیلا سسلنردی اهلبیتن جا به جا
لیک گوردور قجا حسین قارداشیمی اول با وفا
احتراما یا اباعبدالله ایلردی ندا
آفرینش چرغی بیله ماه تابان گورمیوب
اولدی ابراهیمه نازل اود یانندا جبرئیل
هر سوزون اولسا دیدی خدمتگزارم یا خلیل
گیت دیدی کیم پنج تن حقین تانور اولماز ذلیل
منجنیق اوستونده سسلندی حسین جان الدخیل
دوندی اود گلزاره جانی صدمه اودان گورمیوب
بونه سوزدور که بیورموش حضرت خیر الانام
قانیمیز بیردی حسین مندندی منده اونلانام
گلمسیدی فدیه اسماعیلیدن قالمازدی نام
او دیری قالدی حسین گلسین وجوده والسلام
پس حدیث مصطفی کاملدی نقصان گورمیوب
بو حسین کیمدی که دوشمز پاک دللرن آدی
آدینی ذکر ایلدوقجا آغزیمون آرتار دادی
قنداقی عرشه گیدوبدی گور مقامی هاردادی
باشینون دسمالینی جبریل گویدن آسلادی
خلقتندن بیله تزئین عرش رحمان گورمیوب
قاره سین سویماز حسین دیوانه سی گر جان چیخا
سینیه اله ورار تا دوشلرندن چخا
آغلادی شیعه گرک یردن گویه افغان چخا
قویما عاشورا غدیر خم کیمی یادان چخا
مدعی آزاده لردن نقص پیمان گورمیوب
وای اگر قول نبی آویزه گوش اولماسون
بو حسین عشقی گرک دللرده خاموش اولما سون
ایلیون همت که عاشورا فراموش اولما سون
رو سیه دور ایلده هر کیم سیه پوش اولما سون
عشقین اعجازین او بیچاره کما کان گورمیوب
آند اولا ویرانه ده زینب دوتان ماتملره
آند اولا دین دوره سینده حصن مستحکملره
آند اولا ارواح طیب سیر ایدن عالملره
قویماروخ بیگانه چپ باخسون قرا پرچملره
عشق دریا سین هله دشمن خروشان گورمیوب
ای سوزی بیر عمراولان یا لیتنا کنا معک
بعد دفنون قبریون اوسته گلر بیر جوت ملک
سسلنلر ای حسینون عاشقی دور یاتما تک
وحشته دوشمه سنه مولا ئوزی ایلر کمک
هیچ حسینچی تپراق آلتیندا رنج و حرمان گورمیوب
قلبیمیزدن یا حسین بو عاشقی الله آلماسون
تاپشور عباسه عزاداری نظردن سالماسون
تذکره گوندر اورکلرده بو حسرت قالماسون
کربلا شوقیله مرغ جان نجه پر چالماسون
قبریوی چوخداندی بو جمع پریشان گورمیوب
هر بلا گلدی یولوندا جانه آلدوخ یا حسین
باتدی عاششقلر قانا بیز دالا قالدوخ یا حسین
عمر و موز گیچدی نظر یولارا سالدوخ یاحسین
سن آنان جانی داخی بسدی قوجالدوخ یا حسین
بوحالا دوشمز اوکس که داغ هجران گورمیوب
سوز یازوب گیچدیم بو سری واقف مطلب بلر
صبح صادقده نلر وار زنده دار شب بلر
سوز هجرانی هر عاشق چکسه تاب وتب بلر
ای دلیم لال اول حسینون قدرینی زینب بیلر
غصه لی عمرنده زینب راحت جان گورمیوب
مقتله گلدی دیدی دیده مده قان یاش وار یاحسین
هار دا سان سس ور منه نه یارو یولداش وار یا حسین
دشمنیم کامه چاتوب هرالده بیر باش وار یل حسین
بلمزیدیم کربلاده بیر بیله داش وار یا حسین
داشلار آلتدا هیچ باجی قارداشین عریان گورمیوب
فکر یوی قارداش باجون باشدان بلورسن آتمادی
آی گجه باتدی فرات اوسته سیز یلتی باتمادی
من کشیک چکدیم الم عباسه نیلیم چاتمادی
هرنه یالواردیم ربابه صبح اولونجایاتمادی
هیچ آنامدا بیر بیله شام غریبان گورمیوب
وارحسین بیر شایعه سالمیش منی حالدان حالا
کوفده دشمن بیزی ممکندی زندانه سالا
نیلرم نازلی رقیه غملی محبسده قالا
منده ئولم قورخودان ئولسه او شیرین دل بالا
اوچ یاشی واردی هله عمرونده زندان گورمیوب
عادی نسوانه ((کلامی)) زینبی ایتمه قیاس
بو خانم اسلامی احیا ایتدی بی خوف و هراس
یاز ابوالفضلین باجیسی شمره ایتمز التماس
باشینی غارت آغارتدی تارومار اولدی اساس
دوشدی بیر گردابه که نوح ایله طوفان گورمیوب
شاعر:حاج ولی ا... کلامی زنجانی
اگر قبلا در بیان ثبت نام کرده اید لطفا ابتدا وارد شوید، در غیر این صورت می توانید ثبت نام کنید.