" سالوب فشاره منی روزگار کینه نهاد" احوالات امام عصر (عج) از #سیدرضا_حسینی_سعدی_زمان

احوالات امام عصر (عج)

از #سیدرضا_حسینی_سعدی_زمان

از کتاب #چهارده_معصوم_حسینی

 #صفحه381

سالوب فشاره منی روزگار کینه نهاد

ایدم امام زماندان گرکدی استمداد

محسّناتیده گرچه نگاریم اکملدور

ولی یوزین گوره بُلمز او گوز که احولدور

جمال شاهد غیبی گورنمز اهل شهود

بو باب قدرت قهّاریله مقفّلدور

یازوب جمالینه والشّمسی کاتب قدرت

گون اوسته پرده چکوب زلفی لیل اَلیَل دور

جمالی گوندی، اوزی آی کیمی بولوتدا گزر

نه گون نه آی قمر و شمسدن بو افضلدور

بونون یوزیندن ایدر کسب نور شمس و قمر

اولار سراجیدی بو نور حقّه مشعلدور

اولوبدی خلقتی انوار خمسه دن مشتق

باباسی احمد محمود شاه مُرسلدور

وجودی نور اوزی نور اصلی نور باطنی نور

ولیک صورت انسانیله مُشَکّلدور

بو منتظَردی بونا منتظِردی کون و مکان

نه انبیا نه ائمّه اولار که اعقلدور

دیوب خدا بونا حتّی اوزیمده منتظرم

بو لفظه فَانتَظِروا ایه سی مُدَلّلدور

بو نور اوّل ایدوب سُرَّ مَن رَآده ظهور

بیانی مُجمَل اوزی قصّه ی مفصّلدور

ایدوب بو نور دوباره غروب ظاهرده

غروبی لفظ معمّادی حلّی مُعضَلدور

او آفتاب منیره چکوبدی پرده سحاب

شعاعی گون کیمی عالملره مسلسلدور

بو نور بیر گون اولور شرق مکّه دن طالع

گورر هامی او جمالی که سرّ مُنزَلدور

ظهور علائمینی جدّی حضرت صادق

خبر ویروبدی، روایت ایدن مفضّلدور

او گونکه یر یوزینی جور و ظلم دولدوراجاق

بنای ظلمی یخان بو امام اَعدَلدور

ظهور ایدر یر اوزین دولدولار عدالتیله

جفا عدالته عالم گورر مبدّلدور

لوای ظلم هامی شهرلرده پرچم آچوب

یاخوندی گَلماقی معلوم اولار معجّلدور

ازل ظهوریده دیوار کعبیه دایانور

بو مختصر خبرین شرحی چوخ مطوّلدور

قویار مبارک الین ذوالفقار قبضه سینه

گورلّه تاج شرفدن باشی مکلّلدور

بلند صوتیله اوّل کمکلرین چاقورور

گیدن کومک لیقا اوچ یوز اون اوچ مکمّلدور

قاباقجا جدّی حسینون او شاه قانین آلار

بو قانی آلماق عدودن اونا محوّلدور

بنی امیّه الینده حسین اولوب مظلوم

او منتقم آلا بو انتقامی اجملدور

حسینه شام غریبان دوتانمیوب زینب

همین عبارت مستور لفظ مقتلدور

آناسی فاطمه گَلدی جنازه سی اوسته

نه گوردی شام غریبانی خیلی ارذلدور

نه واردی شام غریبان دوتان نه آغلیانی

یانان چادردا قیزی نیلسون معطّلدور

ورق ورق یازیلوب جسم پاکی قرآن تک

قلجلارین یری گویا که سرخ جدولدور

اوغول قانین گوتوروب زلفینه یاخوب اوّل

بو قان او زلف مطرّایه زیب اوّلدور

بویوردی حرمتیوی هتک ایدوب بو قوم ندن؟

خیال ایدوبدیله قانون مگر محلّلدور

شکسته تیر و سِنانیله پیکرون بَزَنوب

سپهر تک بدنون نجمیله مجلّلدور

گورنده اللرینی ووردی باشه غشّ ایتدی

او طول محنته بو بیر بیان مجملدور

گَلنده هوشه دیدی کیم سنی بو حاله سالوب

کسن بو اللری هانسی خطالی بیر الدور

گَلوب کسوک بوغازیندان حزین سسیله صدا

منی بو حاله سالان بیر لعین اعجلدور

کسوب بیلکدن آنا ساربانیم اللریمی

ولیک بارماقیمون قطعی ظلم بجدلدور

"حسینی" دلده حسین آدینی ایدوب ازبر

اُلونجه ترکین ایدنمز بو مشق ازّلدور

مدرّس ازلی درسینی ویروبدی ازل

مدیر مکتب عشّاقیدن محصّلدور

سعدی زمان