"یتنده قافله عشق باب ساعاته" اثر حاج تقی جابری فروغ.
ورود_به_شام_زبانحال_حضرت_رباب (س)
اثر مداح و شاعر اهل بیت
#حاج_شیخ_محمد_تقی_جابری
یتنده قافله عشق باب ساعاته
بهشت رشگ آپاراردی صفای شاماته
نی اوسته جلوه گر اولموشدی آی کیمی شهدا
فضای ظلمت شامه ویرردی نور و ضیاء
بیراوجا نی ده ولی راس میر عشق و وفا
سالاردی گون کیمی بیر جلوه جهان آرا
نه جلوه جلوه لنوب نیزه اوسته آیت عشق
عوالم ایچره مبرهن اولوب حقیقت عشق
نه جلوه انفس و آفاقی محو نور ایلیوب
فراز نیزه نی مشکوه نور طور ایلیوب
نه جلوه جلوه ده مدهوش ایدوبدی موسانی
سالوب تعجبه ساعیرده مسیحانی
بو جلوه دندی درخشندگی جلوه طور
مشیت امریدی ایلوبدی نیزه اوسته ظهور
بو جلوه دن متجلی اولوبدی جاده عشق
بو جلوه صاحبی باشه چکوبدی باده عشق
ویروب صحیفه عشق ایچره هر قضایه رضا
اودور یوزونده مین اسرار عشق اولوب پیدا
بیله مقدر ایدوبدور خدای کون و مکان
اوزی کمک لری اولسون شریعته قربان
وفا ایدوبدی اوپیمان عشقه بی پروا
گیدوب جدایه باشی عصر روز عاشورا
جدا باشندا گلور شامه عشق سلطانی
سالوبدی آردیجا بیر فوج عشقه دارانی
بیر عده آردیجا سرمست و سربدار گلور
بیر عده ناقه لر اوستونده دلفکار گلور
غریبه عالمیدی شهر شام یا زهرا
کجاوه لردن اوجالمشدی عرشه واویلا
دوشنده ناقه لر اوستن جدالره گوزلر
دله گلردی اورکلرده کی نهان سوزلر
بیری دیردی اوغول آغلارام النجه سنه
جداده باخ منه منده باخوم دویونجا سنه
هره سی بیر دلیله دل دیردی آغلاردی
ولیک اصغر آناسی جهانی داغلاردی
دیردی ای آناسین چوللره سالان بالا وای
جفا الیله سوسوز تشنه اوخلانان بالا وای
فراق اودی ایله آتش سالوب دل و جانه
باشون دالنجا دولانام علی یانه یانه
فراز نیزه نی خوش بستر ایتموسن اوزیوه
صبا یلی بالاجا تللرون توکوب یوزیوه
ندندی الفتوی کسموسن اوغول مندن
بیله گمان ایدورم کوسموسن اوغول مندن
سن آیریلاندان اوغول صبح و شام آغلاموشام
سنون غمونده هامی ماسوانی داغلاموشام
اگر قوجاقیمه گلسن جهانی داغلامارام
یقین ایله داخی من اللریوی باغلامارام
بو نسگلون ایله آرامیمی آلور الدن
او قدر گچمز آناوی اوغول سالار دیلدن
بلا چولونده شرار جفاییله یاندون
سو اولمادی سوسوزوندان یانوب الولاندون
خیال ایتمه آنان خوشه وفانی بیچه
محال امریدی سندن صورا سرین سو ایچه
اوغول علی دیمه بوندان صورا دیوب گولم
یورولموشام داخی بو محنتیله من اولم
یازاندا (جابری ) بو سوزناک نوحه لری
روان اولاردی عذاره گوزوندن اشگ تری
خطاسی چوخدی شریعتده چوخلی غفلتی وار
بو غفلتیله ولی حقه قصد قربتی وار
ویروبدی چنگ سنون دامن جلالتوه
نیازی واردی اوغول حشریده شفاعتوه
اثر مداح و شاعر اهل بیت حاج آقا جابری.
اگر قبلا در بیان ثبت نام کرده اید لطفا ابتدا وارد شوید، در غیر این صورت می توانید ثبت نام کنید.