"اولوب سندن صورا ویرانی کنجی مسکنیم قارداش" اثر مرحوم سید حسین رجایی.
خرابه_شام
اولوب سندن صورا ویرانی کنجی مسکنیم قارداش
ولی قورخوم بودی اولسون خرابه مدفنیم قارداش
سالوبسان نچه مدتدور من غمدیده نی گوزدن
دیردی کیم بو نوعیله دونر عالمده یوز یوزدن
ندور باعث علی قارداش علاقه کسموسن بیزدن
دیمورسن کنج غربتده باجیم واردور منیم قارداش
ایدبدور طایر روحیم سر زلفونده کاشانه
او کاشانه سراغنده دوشوب کوه و بیابانه
ویروب ویرانه ده منزل سنون عشقون بو نالانه
اولوب فکر سر زلفون همیشه مامنیم قارداش
مگر عاشق اولان بلبل همیشه یالوارار خاره
امید وصل یاریله گرفتار اولدوم اغیاره
مریض عشقم اولماز دردیمه بولم منیم چاره
اوچوب روحیم قوشی بیر بوش قفسدور بو تنیم قارداش
طریق عشقیده شکوه اساس عشقه نقصاندور
همیشه عاشقین جانی علی معشوقه قرباندور
نثار اول معشوقه راه عشقیده جاندور
الیمده نقد جانیمدور دلیل متقنیم قارداش
مریض عشقی کیم گوردی خلاص اولسون مرارتدن
اطبا درد عشقه قالدیلار عاجز طبابتدن
امیدیم یوخدی بیرده قورتولام قید اسارتدن
پوزولدی گللریم پامال اولوبدور گلشنیم قارداش
گزن راه محبتده بلادن تلخکام اولماز
اوزین یاندرماسا پروانه اودا نیکنام اولماز
بلایه دوزمسم برنامه عشقیم تمام اولماز
مدیر عشقدن گلمز خطاب احسنیم قارداش
منیم تک عاشق صادق هانی بو سطح غبراده
بلادن ایتمیه شکوه جفادن گلمیه داده
اگر چه ظاهرا شمره اسیرم لیک معناده
سنون زلفون اولوب باعث نه تک اهریمنیم قارداش
بلالی باشیمی سالدون جهاندا گور نه غوغایه
گهی قول باغلو چکدون کوفیه گه دیر ترسایه
گلیدون مجلس ابن زیاده بیر تماشایه
گوریدون شعله ور دور دلده اودلی مخزنیم قارداش
زیاد اوغلی جلالین ایستری آفاقه بولدورسون
یتیمه قیزلارین گوز کاسه سین اشگیله دولدورسون
بو فکره دوشدی عمم زینبی مجلسده اولدورسون
اوجالدی طاق عرشه پرده پرده شیونیم قارداش
شفاعت قیلدیلار گچدی اوظالم قتل زینبدن
جهانه اود ویروب یاندیردی دنیانی بو مطلبدن
امامین باشینی ویردی چخوب آیین و مذهبدن
یانوب محصول صبریم او دوتوبدور خرمنیم قارداش
ساراتدی گوردوقوم غملر بو رنگ آلیمی سن سیز
جفای شمر بد اختر پوزوب احوالیمی سن سیز
اگر رخساریمه باخسان بولر سن حالیمی سن سیز
اسیر اولدوم طنابه باغلیوبدور دشمنیم قارداش
دگل ممکن گله هرگز بیانه شامیان ظلمی
خصوصا جور شمر و زجر خولی و سنان ظلمی
بو یولاردا منی جانه گتوردی شامیان ظلمی
آخوبدور خون دل گوزدن بویاندی دامنیم قارداش
اوقدری یولدا دشمن اینجیدوب بو دیده گریانی
گیدوب تالانه صبریم دویموشام جاندان علی جانی
نه تک من شاکیم گل بیر دانشدیر ام لیلانی
دیسون گوزده نجه تار اولدی روز روشنیم قارداش
گلن گوندن بو شامه قالموشام طعن و شمادتتده
قوتاردیم ناگوار عمری علی قید اسارتده
گورن یوخدور ویرام بو زلفومه شانه بو مدتده
انیسیم غصه دور کنج خرابه میهنیم قارداش
ایدوبدور عاشقون چون مکتب عشق ایچره تحصیلی
دوزوب هرگز دیمز قارداش ویروب اعدا منه سیلی
ولی کشف ایلوری مطلب ندور بو علت نیلی
نشاندور ظلم اعدادن بو رنگ سوسنیم قارداش
بودور عاشقلرین رسمی گرگ گوز یاشلی جان ویرسون
شکایت قیلمارام هرقدر زحمت شامیان ویرسون
ویروب دویسون عدو آخر خرابه بیر مکان ویرسون
یازیلمیش روز اولدن خرابه موطنیم قارداش
او قدری آغلارام درده گتورم قلب اعدانی
گل آلود ایلرم گوز یاشمیله ملک ویرانی
گتورم قبریم اوسته نالیه کلثوم و لیلانی
اولار توپراقلار آلتی خوابگاه ایمنیم قارداش
بابام جان ویردی غربتده اساس دین اولا محکم
مقدس بو مرام اوسته نولور منده غریب اولسم
گلایه ایتمرم هرگز قوری یرلرده جان ویرسم
کفن گر اولماسا اگنیمده وار پیراهنیم قارداش
( رجایی ) هر قدر یازسان دگل ممکن تمام اولسون
سوزی آز یاز چوخ آغلار ورد و ذکرون بو کلام اولسون
ولی گر ایسته سن مطلب پسند خاص و عام اولسون
اولوب سندن صورا ویرانه کنجی مسکنیم قارداش
اثر_مرحوم_سید_حسین_رجایی.
اگر قبلا در بیان ثبت نام کرده اید لطفا ابتدا وارد شوید، در غیر این صورت می توانید ثبت نام کنید.