شعری از استاد صراف تبریزی احوالات حضرت علی اکبر( ع )
اولا کول باشینه سندن سورا دونیانین اوغول
سنیدین زینب‌یمین مطلب و منظوری علی
قویدون آغلار گوزیله یاخشی او رنجوری علی
دور گئد‌ک خیمه‌یه ای گوزلریمین نوری علی
گوزو یوللاردا قالیب خیمه‌ده لیلانین اوغول
سنی لب‌تشنه شهید ائیله‌دی بو قوم عدو
گولشن جیسمیوه وئردی دم پیکانیله سو
منده ایندی ائدرم قانیله تجدید وضو
قاریشیر قانیمه بو چولده قیزیل قانین اوغول
مرحبا عشقیوه ای شبه رسول مدنی
ائتمه‌دین محضر جانانیده شرمنده منی
یاخشی الوان ائله‌دین قانیله بو گول بدنی
سرو تک دوشدو یئره سرو خرامانین اوغول
محفل قُربیده اوز جیسمیم اولوب غیر منه
کوفه دن شامه وئریر جذبه‌ی حقّ سئیر منه
بو کشا-کشده علی منزل اولور دِیر منه
اوج ائد‌ر ناله‌سی افلاکه مسیحانین اوغول
سینه‌می ناوک درد غمه آماج ائدرم
زینبین طاقت و آرامینی تاراج ائدرم
منده بو چولده کسیک باشیله معراج ائدرم
قاب قوسینیم اولور طاقی کلیسانین اوغول
سن وفا گلشنی‌نین بیر گول نورسته‌سی‌سن
شُهدا دسته‌سی‌نین عشقیده سردسته‌سی‌سن
اولمویا من کیمی بیر سلسله پابسته‌سی‌سن
نگران‌دیر گورور‌م دید‌ی گیریانین اوغول
نوش قیلدین ره جاناندا بلا جامی علی
چکه‌جکدیر بو ایشین شامه سرانجامی علی
بیرجه آچ گوزلرین ای قلبیمین آرامی علی
گور نه احواله سالیب‌دیر منی هجرانین اوغول
نور دیده بو کمان قدّیمه بیر ایله نظر
تیر آهه یارالی سینه‌می چوخ ائتمه سپر
توکمه‌سه زینب مظلومه اگر اشک بصر
یاندیرار عالمی آه دل سوزانین اوغول
ای اولان سرو قدی زینت میدان بلا
کعبه‌ی وصلیده قیلدین نه گوزل سعی و صفا
ائیله‌دین جانیوی مین شوقیله جانانه فدا
درگه حقّیده مقبول اولا قربانین اوغول
آغلا صرّافیله بو مجلس ماتمده رضا
گوز یاشین خرج اولو گوهر یئرینه روز جزا
آه او دمدن بویوروب اوغلونا شاه شُهدا
بله‌شیب قانه عجب زلف پریشانین اوغول.
اگر قبلا در بیان ثبت نام کرده اید لطفا ابتدا وارد شوید، در غیر این صورت می توانید ثبت نام کنید.