بحر غمدن گله دوشسم دئیرم یا حیدر/موجیدن ساحله دوشسم دئیرم یا حیدر.
بحر غمدن گله دوشسم دئیرم یاحیدر
موجیدن ساحله دوشسم دئیرم یاحیدر
آقاما قربان اولوم گوزلرینه مشتریم
باخسادا نوکریم باخماسادا نوکریم
من فقط بیر ورق بی رمقم جاندی علی
من گدای در عشقم ولی سلطاندی علی
من همان مور ضعیفم که سلیماندی علی
او یامان گونده الیمدن دوتاجاق حیدریم
دوتسادا نوکریم دوتماسادا نوکریم
حافظ دولت اکرامیدی مولامیز علی
ناشر مکتب اسلامیدی مولامیز علی
شیعیه یار دل آرامیدی مولامیز علی
ساتورام جانیمی جانانیمه سوداگریم
آلسادا نوکریم آلماسادا نوکریم
سیخیل ای دل او ولایت گولونون سایه سینه
باخ کرامت باغینون جلوه و پیرایه سینه
سرو طوبای جنان چاتماز اونون پایه سینه
گولسه بیر یول یوزونه فخر ائدرم چاکریم
گولسه ده نوکریم گولمسه ده نوکریم
کیم قسم وئرسه آقام حیدری زهرا جانینا
دردی درمانه چاتار آند اولا طاها جانینا
آند وئرّم اونی صدیقه ی کبری جانینا
یازا گر تذکره مرغ حرم اطهریم
یازسادا نوکریم یازماسادا نوکریم
کیم اونی بیلمسه مولا نجه راحت ئوله جاق
من او مولایه دخیلم اورگیم دینجله جاق
جان وئرنده بیلورم باشیمون اوسته گله جاق
ئولم آسوده او گلسه ، آدینون ازبریم
گلسه ده نوکریم گلمسه ده نوکریم
عالمه ناز ائله ای مشتری ناز علی
بودی اعجاز ولایت بودی اعجاز علی
ماخلقدن اوجادی رتبه ممتاز علی
ایستورم بیر صله مدتدی غلام دریم
وئرسه ده نوکریم وئرمسه ده نوکریم.
حیدریم حیدری