"دور ای دین خدانین تشنه لب قربانی من گئتدیم" شعر از استاد حاج احد عدلجوئی غازانی
سه شنبه, ۵ بهمن ۱۳۹۵، ۰۲:۰۷ ب.ظ
نام نوحه : کوچ از قتلگاه زبانحال حضرت زینب کبری(س)
نام شاعر :احد عدلجوئی غازانی متخلص به : (عدل جو )
دور ای دین خدانین تشنه لب قربانی من گئتدیم
آنام زهرانین ای پرپر اولان ریحانی من گئتدیم
سن ئوز ایثارویله ایلدون اسلامی پاینده
ویروب قان ساخلادون دنیا بوئی قرآنی ایمنده
قسم اوز جانیوه زنده بو قانی ساخلارام منده
باجون قویماز یاتا سن قویدوقون بنیانی من گئتدیم
خروشان سیل تک سندیردی قانین سدٌ بیدادی
قویوب جان نقدی ایتدون خرابه دیری آبادی
گلن ادواره یازدون قانیله دیوان آزادی
باجون منشور ایدر سن یازدیقین دیوانی من گئتدیم
حسین زهرا قیزین صید ایلیه بلمزدی مین صیّاد
سنون عشقونده باغلاندی قولوم اولسون ایوین آباد
غم ایتمه ایلرم قول باغلی ظلمین قصرینی بر باد
فنایه قویمارام گیتسین شهیدلر قانی من گئتدیم
اگر چه باغلانبدور قولاّریم قید اسارتله
ولی اُلسمده سازش ایتمرم اهل ضلالتله
آنام تک دشمنه عجز ایتمرم اُلّم شهامتله
اُلومدن ذرّه باکیم یوخدی زهرا جانی من گئتدیم
حسین آسوده خاطر یات بو نهضت قویمارام یاتسین
گیدوب مرجانه اوغلون قویمارام مقصودینه چاتسین
برادر ناگران اولما آدون من قویمارام باتسین
یتورّم آخره بو نهضت عظمانی من گئتدیم
اگر چه یورقونام غملر سالوبدور تابدن امّا
دیار کوفیه چاتسا ایاقیم ای گل طاها
زیادین اوغلونی ئوز مجلسنده ایتمه سم رسوا
آدیم زینب دگول وار عشقمین نقصانی من گئتدیم
حسین جان غم یمه سیندی سپاهون اُلدی سردارون
علمدارون یخلدی قانه باتدی یار و انصارون
باجون زینب هله صاقدور ئوزوم اولّام علمدارون
یئتشسم شامه ویرّام پرچم قرآنی من گئتدیم
سنون عشقونده قارداش اوزموشم ال بو شیرین جاندان
نه باکیم واردو گولماقدان نه قورخوم واردی زنداندان
سنیله ایتموشم پیمان دونم حاشا او پیماندان
یتورّم باشه عشقیله همان پیمانی من گئتدیم
آتام تک حق پرستم حقّدن هر یرده دم ویرّام
دولانّام کوی عشقونده شهامتله قدم ویرّام
یزیدون نقشۀ آمالینه نقش عدم ویرّام
مرامه قویمارام چاتسون او بی ایمانی من گئتدیم
سنیلن زینبون واردور ازلدن عشق سوداسی
جهان ملکون دوتا دشمن بلورسن یوخدی پرواسی
آدون اخلال گر قویدی شریحون نحس فتواسی
باجون ابطال ایدر قارداش ایله فتوانی من گئتدیم
غم ایتمه قویدی مفتی آدیوی اخلال گر قارداش
شریحون منطقیله ایلرم حکمین هدر قارداش
یزیدون کاخ ظلمین ایتمه سم زیر و زبر قارداش
آدیم تاریخه ثبت اولماز بتول ثانی من گئتدیم
هارا گیتسم گوزل اهدافوی افکاره آندیرّام
حیالی قیزلارون سن تک وقاریله دولاندیرّام
چراغ مرتضانی غم یمه هر یرده یاندیرّام
یزیدین روزگارین ایلرم ظلمانی من گئتدیم
بوئیدی نیّت شومی بو قوم کافرین قارداش
آلیدی معجرین بو چولده آل حیدرین قارداش
اُلر زهرا قیزی ویرمز باشندان معجرین قارداش
بو معجردور حقیقی عشقمین برهانی من گئتدیم
ثبوت حقّوه قارداش الیمده یاخشی برهان وار
اوزوم بولّم اسارتده دوگولماق واردی زندان وار
یزیدین بزم عیشین پوزماسام عهدیمده نقصان وار
یتورّم پرتگاهه دشمن نادانی من گئتدیم
سزادور گوزلریمدن آخسا گر رخساریمه قانیاش
بو قلبوندن دگن پیکان دگبدی قلبیمه ای کاش
دلیم یانسون دگولماقدان گلایه ایله سم قارداش
آنام زهرانی ده ناحق دوگوبدور ثانی من گئتدیم
واروندور احتیاجون دفنه فرصت کوفیان ویرمور
نه چاره ایلیوم فرصت منه شمر و سنان ویرمور
بو باشسیز پیکری دفن ایلیم دشمن امان ویرمور
قویوب گونلر قباقنده بو گل اعضانی من گئتدیم
سنه من اوخشارام اوغلی اُلن مادر سیاقیندا
جنازن گل کیمی پرپر اولوب آتلار ایاقیندا
باجون اُلسون دوننن قالموسان گونلر قباقندا
آپارام دلده قبره بو غم سوزانی من گئتدیم
باتور گون کاروانیم یولاّنور وار دلده مین محنت
دویونجا آغلیام قویمولاّ نیلوم قالدی بو حسرت
سنه یولدان گیچن آغلار منه که اولمادی فرصت
خدایه تاپشوروب بو پیکر عریانی من گئتدیم
دوز عاشق "عدل جو" اولماز اسیر نفس عمّاره
رموز عشقی دوز عاشق بولر کشف اولماز اغیاره
توانا زینبه هر کیم دیسه عالمده بیچاره
اوزی بیچاره دور وار عشقنون نقصانی من گئتدیم
اگر قبلا در بیان ثبت نام کرده اید لطفا ابتدا وارد شوید، در غیر این صورت می توانید ثبت نام کنید.